Bu Albert yn ofalwr yr eglwys Fethodistaidd Saesneg yn Hen Golwyn cyn ailbriodi gyda Hannelore a symud i'r Almaen. Bu'r ddau drosodd yng Nghymru gyda'r côr mae Hannelore yn ei arwain ac yn cynnal cyngherddau yn Eglwys Bach a Hen Golwyn.
Eleni, ein tro ni, sef 28ain ohonom o Hen Golwyn ac Eglwys Bach, oedd ymweld â'r Almaen, gan gychwyn gyda choets Foel ar Fawrth laf a chroesi o Hull i Rotterdam.
Cawsom daith braf, caban cyfforddus a bwyd ardderchog. Yna ar draws Holland a chyrraedd Apen, lle'r oedd Albert a Hannelore yn ein disgwyl.
Cawsom groeso ardderchog a chyfarfod nifer rydym yn eu hadnabod o ymweliadau blaenorol, cawl cartref gwych a sgwrs ddifyr.
Yna cawsom ein cludo i'n llety - roedd Bett Doroshenko a finnau yn aros gydag Albert a Hannelore. Cawsom swper a sgwrs yn nhref Westerstade y noson honno.
Ar y bore Sadwrn, i ffwrdd â ni gyda Dave a'r goets i dref hardd a phrysur Oldenburg, lle'r oedd coffi neu bryd o fwyd i'w gael ar y byrddau ar y pafin. Un peth oedd yn ein taro - mor barod oedd pawb oedd yn gweini i ddefnyddio Saesneg yn hapus - faint fedr roi'r un ymateb yn Gymraeg heb sôn am Almaeneg neu Ffrangeg yma?
Yna, gyda'r nos, i le arall ger Westerstade, sef ysbyty milwrol ar lan llyn Bod Zwisenhenalm sydd newydd gau i'r gwaith hwnnw, ond gyda neuadd wych a chegin a'r gwasanaethau eraill.
Cawsom gyngerdd gwych a hwyliog yno gyda phob math o eitemau, megis sgets, drama fer, partïon canu a band piano acordion.
Fe ganodd aelodau o'n parti ni, dan arweiniad y Parch David Woodward, yn wych. Roedd ef yn cymryd lle'r Parch Ruth Reynolds, sef gweinidog capel Hen Golwyn, oedd yn yr ysbyty yn cael triniaeth ar y pryd. Wrth gwrs, cafwyd swper yn dilyn y cyngerdd.
Bore Sul yn cyrraedd, ac i'r capel yn Westerstade, a braf dweud ei fod dan ei sang, gyda'r Parch David Woodward yn rhoi anerchiad a rhai o Golwyn yn cymryd rhan ynghyd ag aelodau'r capel yno.
Cawsom anerchiad i'w gofio gan Faer y dre a ddywedodd mor
bwysig yw i werin y ddwy wlad gymysgu trwy ymweld a lletya â'i
gilydd, o bosib na fuasai terfysg y ganrif ddiwethaf wedi digwydd petai mwy o hynny wedi digwydd.
Yna aethom yn syth o'r capel i'r goets ac am daith mewn cwch ar y llyn, a hithau'n boeth.
Aeth pawb i gartref Albert gyda'r nos - adeilad fu'n fferm fechan ar un adeg, ond sydd nawr yn glamp o dy gydag un ystafell cymaint neu fwy nag ambell i festri capel.
Cawsom ddigon o fwyd eto, cawl cartref wedi ei baratoi gan rai o'r gwragedd sydd yn gôr bach carolau adeg y Nadolig, rhai ohonynt yn wreiddiol o ochr yma i'r dŵr ond wedi priodi ac aros yn yr Almaen.
Cawsom noson wych a hwyliog gyda chanu a phob math o rialtwch, ac wrth gwrs, sôn am ymweliad arall rhwng Cymru a'r Almaen.
Bore Llun wedi cyrraedd lawer yn rhy fuan a chyfarfod ym maes parcio'r drefi gael cwta ddwy awr i gael golwg ar y siopau neu sgwrs a choffi wrth y byrddau ar y pafin. Cawsom dynnu lluniau am hanner dydd wrth y goets ac yna i Rotterdam i dal y llong.
Penwythnos i'w gofio wrth ffarwelio a ffrindiau, hyn yn anodd bob amser
Ìý
