|
Mae Huw, cyn-ddisgybl yn y Gelli a Syr Hugh, newydd ddechrau ar ei swydd fel peilot gyda Ryanair, yr hyn oedd o eisiau ei wneud ers pan oedd yn ddim o beth.
Ond fe gychwynnodd y daith i wireddu ei freuddwyd o ddifrif ym maes awyr Caernarfon dair blynedd yn ôl pan gafodd ei drwydded hedfan gynta, ei PPL (Private Pilot's Licence). Hedfan awyrennau bychain fuo fo wedyn tra'n graddio mewn Eidaleg, Ffrangeg a Sbaeneg ym Mangor, cyn cychwyn ar y gwaith caled o geisio am drwydded hedfan fasnachol (y Commercial Pilot's Licence - CPL), sef yr awyrennau mawr!
Dwy flynedd gymerodd hi. Gorfod pasio 14 o arholiadau i ddechrau ac yna hedfan 150 awr mewn awyrennau bychain yn Shoreham ger Brighton. Cyfnod o werthfawrogi tirlun gwastad de Lloegr a phicio i ogledd Ffrainc a Jersey bob hyn a hyn!
Cyfnod yn Stapleford, Essex wedyn yn hyfforddi mewn ffug awyrennau mwy - 'simulators' - er mwyn cael ei drwydded fasnachol.
Ond doedd yr hyfforddi ddim ar ben o bell ffordd. Ar ôl bod yn hynod o ffodus i gael bachiad gan Ryanair, bu'n rhaid treulio chwe wythnos dwys yn yr Iseldiroedd wedyn yn dysgu hedfan y math o awyrennau sydd gan Ryanair, sef Boeing 737.
O ganlyniad mae Huw ar y funud yn hedfan awyrennau 737 o Stansted, yn y gobaith o gael gweithio yn barhaol o Lerpwl ryw dro.
Mae lle i hyd at 189 o bobl ar y 737. Ond pan fydd y peilot yn dod 'nol i Dre i weld ei deulu a'i ffrindiau chaiff o ddim gyrru car ei dad gan nad yw polisi yswiriant yr 'hen go' yn caniatau hynny! Rhyfedd o fyd.
 |
Ìý
